മമ്മൂട്ടിയും ദുല്‍ഖറും നേര്‍ക്കുനേര്‍; 'ഐ ആം ഗെയിം' റിലീസ് മാറ്റത്തിന് പിന്നാലെ ഒരുങ്ങുന്നത് പുത്തന്‍ ക്ലാഷ്

ഓണം റിലീസായി തിയേറ്ററില്‍ എത്താന്‍ ഒരുങ്ങുകയായിരുന്നു ദുല്‍ഖര്‍ സല്‍മാന്‍ നായകനായി എത്തുന്ന ഐ ആം ഗെയിം. എന്നാല്‍ ചിത്രത്തിന്റെ റിലീസ് ഇപ്പോള്‍ മാറ്റിവെച്ചിരിക്കുകയാണ്. ഓഗസ്റ്റ് 20ന് റിലീസ് ചെയ്യാനിരുന്ന ചിത്രം സെപ്റ്റംബര്‍ മൂന്നിനാണ് ഇനി തിയേറ്ററുകളിലേക്ക് എത്തുക.

ആഗോള തലത്തില്‍ കൂടുതല്‍ മാര്‍ക്കറ്റുകളിലേക്കും കൂടുതല്‍ പ്രേക്ഷകരിലേക്കും ചിത്രം എത്തിക്കാനായാണ് സെപ്റ്റംബര്‍ മൂന്നിലേക്ക് ചിത്രത്തിന്റെ റിലീസ് മാറ്റുന്നത് എന്ന് നിര്‍മാതാവ് കൂടിയായ ദുല്‍ഖര്‍ സോഷ്യല്‍ മീഡിയ പോസ്റ്റിലൂടെ വ്യക്തമാക്കി. ഈ റിലീസ് തീയതി മാറ്റത്തിന് പിന്നാലെ ഓണം ക്ലാഷില്‍ നിന്ന് ദുല്‍ഖര്‍ പുറത്തുവന്നിരിക്കുകയാണ്.

എന്നാല്‍ നടനെ കാത്ത് കൗതുകമുണര്‍ത്തുന്ന മറ്റൊരു ക്ലാഷ് വരുന്നുണ്ട്. അത് സാക്ഷാല്‍ മമ്മൂക്കയുമായാണ്. മമ്മൂട്ടിയും ദുല്‍ഖറും ഇതുവരെ സിനിമകളില്‍ ഒന്നിച്ചില്ലെങ്കിലും ഇപ്പോള്‍ തിയേറ്ററില്‍ ഒരു ചെറിയ ക്ലാഷിന് ഒരുങ്ങുന്നത് ആരാധകരാണ് കണ്ടുപിടിച്ചത്. മമ്മൂട്ടി അതിഥി വേഷത്തിലെത്തുന്ന 'ലോ ആന്റ് ഓര്‍ഡര്‍' എ്‌ന ചിത്രത്തിന്റെ റിലീസാണ് ഈ ക്ലാഷിന് വഴിവെച്ചിരിക്കുന്നത്.

സെപ്റ്റംബര്‍ നാലിനാണ് പ്രകാശ് വര്‍മയെ നായകനാക്കി രഞ്ജിത്ത് സംവിധാനം ചെയ്യുന്ന ചിത്രമെത്തുന്നത്. രഞ്ജിത്ത് തന്നെ സംവിധാനം ചെയ്ത ബ്ലാക്ക് എന്ന ചിത്രത്തിലെ കരിക്കാമുറി ഷണ്‍മുഖനായാണ് മമ്മൂട്ടിയുടെ കാമിയോ റോള്‍ എത്തുന്നത്.

2004ല്‍ പുറത്തിറങ്ങിയ ചിത്രം അന്ന് വലിയ സ്വീകാര്യത നേടിയില്ലെങ്കിലും പിന്നീടുള്ള വര്‍ഷങ്ങളില്‍ മമ്മൂട്ടി ഗുണ്ടാ പൊലീസുകാരനായ കരിക്കാമുറി ഷണ്‍മുഖന്‍ കള്‍ട്ട് ക്യാരക്ടറായി മാറിയിരുന്നു.

പതിനാല് വര്‍ഷങ്ങള്‍ക്ക് ശേഷം കാമിയോ വേഷത്തിലാണെങ്കിലും മമ്മൂട്ടി ഷണ്‍മുഖനായി എത്തുമ്പോള്‍ അപ്പുറത്ത് നില്‍ക്കുന്നത് ദുല്‍ഖറിന്റെ ഡാന്‍ ജോണ്‍ എന്ന നായക കഥാപാത്രമാണ്.

Content Highlights: Mammootty and Dulquer to clash in theatres through I M Game and Law and Order movies as they are going to release on the first week of September